Mfalme wa soka kutoka Ureno, mshindi mara 5 wa tuzo ya Mchezaji Bora wa Dunia, anaitwa Cristiano Ronaldo ukipenda unaweza ukamuita ‘mashine ya kufunga’, yeye ni kama Pablo tu, hashikiki! Jana ameweka rekodi nyingine ya kuvutia baada ya kuwa mchezaji wa kwanza kufunga magoli 900 katika michezo rasmi.
Mshambuliaji huyo mweye umri wa miaka 39 anazidi kuliandika jina lake katika historia ya soka wino wa dhahabu na ni wazi kwamba atasimuliwa vizazi na vizazi hata baada ya yeye kutokuwepo. Ronaldo amefunga goli lake hilo la 900 katika mchezo wa timu yake ya Ureno dhidi ya Croatia katika mashindano Ligi ya Mataifa Ulaya akifanikiwa kulifungia taifa lake goli la ushindi na katika ushindi wa 2-1, goli hilo linakuwa goli lake la 131 kwa nchi yake.
Kumekuwa na wachezaji wengi wenye uwezo mkubwa wa kufunga magoli na kutabiriwa kuja kufanya makubwa lakini wakapotea, walikuja walimkuta Ronaldo wakaondoka na kumuacha hapa kwani yeye ameuwasha moto huu wa kufunga kwa zaidi ya miongo miwili sasa!
Safari yake ilianza mwaka 2002, akiwa na umri mdogo wa miaka 17, wakati alifunga mabao mawili kwa Sporting Lisbon. Tangu wakati huo, Ronaldo amefunga magoli akiwa na Manchester United, Real Madrid, Juventus, na anazidi kufanya hivyo hivi sasa akiwa na Al-Nassr.
Ronaldo aliwafungia Sporting Lisbon magoli 5, magoli 145 kwa Manchester United, 450 kwa Real Madrid, 101 kwa Juventus, 131 kwa timu ya taifa ya Ureno na 68 kwa Al Nassr!
Ingawa hakuna kumbukumbu rasmi ya mfungaji bora wa wakati wote katika soka la wanaume, magoli 900 ya Ronaldo yanamweka katika daraja la peke yake kwani amewazidi wachezaji kama Lionel Messi, mwenye magoli 838, Bican aliyefunga 805, Romario mwenye 768 na Pele ambaye alifanikiwa kufunga magoli 757.
Licha ya umri mkubwa wa miaka 39, malengo ya Ronaldo ni kufikisha magoli 1,000 jambo ambalo linaonekana kuwezekana kutimia kama majeraha yasipoingilia kati kuzuia ndoto huyo isitimie.
Post a Comment