Chelsea Watambulisha Jezi Mpya Ya Nyumbani Bila Nembo Ya Mdhamini Mkuu

Kuelekea msimu mpya wa Ligi Kuu ya Soka Uingereza - EPL - klabu ya Chelsea maarufu kama The Blues imetambulisha jezi mpya itakazozitumia katika mechi zake za nyumbani msimu huu wa 2024/2025.

Klabu hiyo yenye maskani yake jijini London imetoa taarifa ya jezi hizo kupitia kurasa zake za kijamii na kuashiria mwanzo wa zama mpya kwa timu hiyo. “Msimu mpya. Zama mpya. Moto mpya” yalisomeka maelezo ya taarifa hiyo na kuongeza “Tunatambulisha jezi ya nyumbani ya Chelsea kwa msimu wa 2024/25.”

Kama kawaida rangi kuu katika jezi hiyo ya nyumbani ya Chelsea ni bluu ikinakshiwa na alama zenye kuonesha miale ya moto inayofanana na madoadoa ya mafuta ikiwa ni ishara ya malengo ya timu kufanya vizuri ndani na nje ya uwanja.

Jezi mpya ya Chelsea inakuja kipindi ambacho timu hiyo inakaribisha mameneja wapya, Enzo Maresca kwa kikosi cha wanaume, na Sonia Bompasfor kwa kikosi cha wanawake.

Jezi hizo zilizotambulishwa msimu huu hazina nembo ya mbele ya mdhamini kama ilivyokuwa kwa za msimu uliopita na Chelsea bado wanatafuta mdhamini mpya mara baada ya mkataba wao wa msimu mmoja na Infinite Athlete kumalizika. “Jezi zetu mpya tayari zinapatikana duniani kote japo hazina nembo ya mbele ya mdhamini. Iwapo tutapata mdhamini siku zijazo, mashabiki wataweza kupata aina hizo za jezi kwa kununua katika duka letu na mtandaoni. Bahati mbaya hatutoweza kuwabadilishia jezi hizo kwa mpya zenye nembo”, Ilisema taarifa ya klabu hiyo.

Wakati mzuka wa jezi mpya ukiwa bado haujapoa, Chelsea tayari wameshaanza maandalizi ya kuanza msimu ujao wa 2024/25 chini ya Maresca na Bompastor. Timu ya wanaume tayari imeshaanza kambi na inajiandaa kwa ziara nchini Marekani.