Kai Havertz Afunga Ndoa

Kwa mshambuliaji nyota wa Ujerumani na Arsenal, Kai Havertz, maisha yamekuwa matamu zaidi. Hii ni baada ya kufunga ndoa na mpenzi wake wa muda mrefu, Sophia Weber, na sasa Havertz yuko tayari kusahau kuhusu machungu ya kukosa Kombe la Euro 2024 akiwa na timu yake ya taifa ya Ujerumani na kuanza msimu mpya wenye matumaini ya ushindi na klabu yake ya Arsenal huku akiwa na mpenzi wa maisha yake.

Ingawa safari ya Ujerumani kwenye Euro 2024 ilimalizika kwa namna ya kusikitisha kwani waliishia katika hatua ya robo fainali, Havertz amepata faraja baada ya sherehe ya ndoa yake na Weber mnamo Julai 18. Katika picha nzuri kutoka kwenye sherehe hiyo zilizopakiwa kwenye mtandao maarufu wa Instagram, wanandoa hao walitangaza upendo wao kwa maneno machache lakini yenye nguvu: "18.07.24 - milele."

Kai Harvetz na mke wake Sophia Weber

Msimu uliopita ulikuwa msimu bora sana kwa Havertz, katika maisha binafsi na kwenye soka, kwani: Alisajiliwa kutoka Chelsea kwenda Arsenal na kisha kuingia haraka katika kikosi cha kwanza  cha timu hiyo akijihakikishia kuwa mchezaji muhimu katika kikosi cha washika mtutu hao wa jiji la London. Msimu wake wa kwanza ulikuwa wa kuvutia kwani alifanikiwa kupachika mabao 14 na kutoa pasi 7 za usaidizi katika mechi 51 kwenye mashindano yote. Havertz aliendeleza kiwango chake kizuri hadi katika Euro 2024 akiwa na Ujerumani akifunga mabao mawili na kutoa pasi moja ya usaidizi katika mechi tano!

Sherehe za harusi zikiisha, Havertz anatarajiwa kuungana tena na kikosi cha Arsenal wiki ijayo. Washika Mtutu hao wa jiji la London wanafanya ziara yao ya maandalizi ya msimu mpya nchini Marekani, ambapo wakiwa huko wanatarajia kukabiliana na baadhi ya majina makubwa ya Ulaya, ikiwa ni pamoja na Manchester United, Liverpool na Bayer Leverkusen. Ziara hii inayosubiriwa kwa hamu itakuwa mtihani muhimu kwa Havertz na wenzake wanapojengeana uelewano zaidi na kuboresha mikakati chini ya meneja wao Mikel Arteta.

Kwa mwelekeo mpya, mke wa kumuunga mkono, na ziara ya maandalizi ya msimu mpya ili kuboresha uwezo wake, Havertz anaonekana kuwa tayari kwa kuanza msimu mzuri na Arsenal. Je, ataweza kurudia rekodi yake ya kuvutia ya ufungaji na kuwaongoza Arsenal kwenye mbio za ubingwa wa Uingereza msimu ujao wa 2024/2025? Mashabiki wa Arsenal kote duniani watatazamia kwa karibu kumuona Havertz mpya uwanjani na nje ya uwanja.