Marcus Rashford Apigwa Marufuku Kuendesha Gari Kisa Uzembe na Mwendo Kasi

Kiungo wa Manchester United, Marcus Rashford, amejikuta na wakati mgumu baada ya mahakama kumuadhibu kwa kosa la kuendesha gari kwa uzembe.

Marcus Rashford

Rashford anadaiwa kuendesha gari lake aina ya Rolls Royce kwa mwendokasi kupitiliza hadi kufikia kwenda maili 104 kwa saa kwenye barabara kuu ya M60 akitoka kwenye kumbi za starehe. Adhabu alizopewa nyota huyo wa Manchester United ni: marufuku ya kuendesha gari kwa miezi sita, faini ya pauni £1,666, na gari lake hilo la kifahari lenye thamani ya £560,000 kuwekwa kizuizini.

Hii sio mara ya kwanza kwa Rashford kupata matatizo barabarani. Miezi michache tu iliyopita, alihusika kwenye ajali akiwa na mojawapo ya magari yake mengine ya kifahari.

Ripoti zinasema katika utetezi wake Rashford alidai alihisi anafuatiliwa, ndio maana aliendesha kwa mwendo kasi. Hata hivyo, mamlaka hazikuridhika na sababu zake.

Wakati huu ikiwa msimu mpya unakaribia kuanza, Rashford atalazimika kuachana na kiti cha dereva na kukaa upande wa abiria, akitegemea wachezaji wenzake au usafiri mbadala hadi adhabu yake yake itakapomalizika. Maswali ni mengi, Je sakata hili litaathiri uwezo wake uwanjani? ni wakati pekee ndio utaweza kutuambia ukweli, lakini jambo moja ni hakika: Rashford atalazimika kuzingatia namna yake ya uendeshaji hususani katika barabara za umma.

Tukio hili linatumika kama tahadhari kwa wachezaji wa mpira na mashabiki pia wenye tabia kama za mchezaji huyo. Ingawa inaweza kuonekana kwamba magari ya kifahari na mwendo kasi ni vitu vinavyoenda sambamba, kuzingatia sheria ni muhimu ili kuepuka sio tu faini au kufungiwa kuendesha, lakini pia hata ajali zinazoweza kuepukika. Pengine Rashford anaweza kutumia muda huu kuboresha ujuzi wake wa kupiga pasi - uwanjani, bila shaka!