Mashabiki Wavuruga Mechi Rosenborg vs Lillestrom Kisa Kupinga VAR

Mchezo wa Ligi ya Norway, Eliteserien, wa jana Jumapili kati ya Rosenborg na Lillestrom uliahirishwa kutokana na vurugu za mashabiki waliokuwa wakipinga matumizi ya teknolojia ya VAR. 

Dakika 30 za mwanzo za mechi hiyo zilishuhudia matukio ya kushangaza kutoka kwa mashabiki wa timu zote mbili ambao waliungana katika kutokubaliana kwao na VAR, walirusha mvua ya vitu mbalimbali uwanjani ikiwa ni pamoja na mipira ya tenisi na mikate huku wakisababaisha milipuko ya baruti.

Mashabiki wa Rosenborg, wanaojulikana kwa ushangiliaji wao wa vurugu, ndio waliofanya kitendo cha kwanza cha upinzani. Walirusha mipira ya tenisi uwanjani na kisha wenzao wa Lillestroem wakawaunga mkono hali iliyopelekea waamuzi kusitisha mchezo. Katika kuhakikisha mamlaka husika zinapata ujumbe wao, mashabiki hao hawakuishia tu kufanya vurugu lakini pia  walitandaza bango lililotangaza kupinga kwao teknolojia ya VAR: "Hatutakata tamaa kamwe, VAR itaondoka!"

Licha ya onyo kali kutoka kwa mtoa matangazo wa uwanjani kwamba kuendelea kwa vurugu zaidi kungesababisha kuahirishwa kwa mchezo huo, vurugu za mashabiki hao hazikuweza kuzimwa. Mipira zaidi ya tenisi iliendelea kutupwa uwanjani kuonesha uthabiti wa nia yao waliendelea kuimba “Tunachukia, tunachukia VAR, Tunachukia, tunachukia VAR”  na ujumbe wao ulikuwa wazi: VAR haitakiwi. Hatimaye mwamuzi hakuwa na budi kusitisha mchezo huo kabisa.

Kuahirishwa kwa mchezo wa Rosenborg na Lillestrom kunakumbushia juu ya malalamiko ya mashabiki wa mpira wa miguu kote duniani kuhusu VAR. Wakati malengo ya teknolojia hii ni kuhakikisha usahihi wa maamuzi uwanjani, inaonekana kuwa inaathiri radha na mtiririko mzima wa mchezo.