Simba SC Yauanza Msimu wa 2024/25 kwa Kasi: Davids na Ahoua Wang’aa

Klabu ya soka ya Simba SC imeendelea kudhihirisha ukubwa wake katika Ligi Kuu ya NBC kwa kuonesha kiwango bora kabisa mwezi Agosti huku michango ya kipekee ikioneshwa na Kocha wao mkuu Fadlu Davids na kiungo mshambuliaji Jean Ahoua.

Kocha wa Simba Fadlu Davids

Davids, ambaye alijiunga na Simba SC mwezi Julai 2024, ameonekana kuwa na athari chanya kwenye kikosi cha timu ya Simba kutokana na ukweli kwamba amewabadilisha namna wanavyocheza na kupata matokeo katika mechi zao. Katika mechi zake mbili za kwanza za ligi, Simba SC ilipata ushindi dhidi ya Tabora United (3-0) na Fountain Gate (4-0), ikifunga mabao saba bila kuruhusu kufungwa goli hata moja. Matokeo haya ya kuvutia yalimhakikishia Davids tuzo ya Kocha Bora wa Mwezi Agosti.

Kiungo mshambuliaji, Jean Charles Ahoua, kwa upande mwingine, amekuwa na mchango muhimu katika mafanikio haya ya Simba SC. Goli lake dhidi ya Tabora United, mchango wake katika mabao mengine na namna ambavyo amekuwa akileta muunganiko katika timu vimekuwa na umuhimu mkubwa katika ushindi wa timu, mchango wake huu umemfanya kutunukiwa tuzo ya Mchezaji Bora wa Mwezi.

Chini ya uongozi wa kocha Fadlu Davids, Simba SC imejiimarisha na kudhihirisha ukubwa wao katika ligi. Uwezo wa timu katika kujenga na kufanikisha mashambulizi na namna wanavyojilinda umekuwa wa kuvutia, na mashabiki wanatarajia kuona haya yakizidi kuongezeka na kuifanya timu iwanie ubingwa wa NBC kwa msimu huu.

Uwezo na matokeo ya Simba SC mwezi Agosti katika Ligi Kuu ya NBC haujasaidia tu kuongeza ujasiri wao bali pia umetuma ujumbe mkubwa kwa wapinzani wao kuwa wakiongozwa na kocha Davids na wachezaji wao bora kama Jean Ahoua, Debora Fernandez, Lionel Ateba, Awesu Awesu na wengine, timu iko katika nafasi nzuri ya kushindania ubingwa wa ligi.

Na Luck Mwaifuge